23.6.15

«Եթէ կոտրուի մեր այս ջահելութիւնը՝ այս իշխանութիւններին ներում չկայ...»

Երէկ ծանր գիշեր մըն էր Հայաստանի համար: «Ո՛չ թալան»ին նախաձեռնութեան շուրջ բոլորուած մեծ թիւով քաղաքացիները մինչեւ առաւօտեան ժամերը նստացոյց  ըրին Բաղրամեան փողոցի նախագահական նստավայրին դիմաց: Առաւօտեան  կանուխ ժամերուն ջրցան մեքենաներ գործի լծելով, ՀՀ ոստիկանութիւնը մեծ թիւով   ձերբակալութիւններու ձեռնարկեց: Անկանխատեսելի էին մանաւանդ հայրենի լրատուական միջոցներուն, յատկապէս «Ազատութիւն» եւ «Հետք»ի լրագրողներուն դէմ կիրառուած բռնութիւնները: 
«Ազատութիւն»  ռատիօկայանի  լրագրողը,  այս առաւօտ եթեր մտնելով, յաւելեալ մանրամասնութիւններ պատմեց երէկ տեղի ունեցած դէպքերուն եւ իրենց նկարահանող խումբին դէմ  եղած  բռնութիւններուն մասին, նշելով, որ իրենց նկարահանման սարքերը     կոտրուեցան: Կը հաղորդուի նաեւ, որ ներկայ պահու դրութեամբ Հայաստանի ոստիկանատուները կան շուրջ 237  երիտասարդներ, որոնք   տարբեր հանգամանքներու տակ, շատերը բռնութեամբ` ձերբակալուած են:
Ո՞վ է շահողը այս բոլորէն: Իշխանութիւննե՞րը, ՀԷ՞Ցը (Հայաստանի  ելեկտրական ցանցեր), ընդդիմութի՞ւնը կամ ՀՀ քաղաքացի՞ն: Հարցումը հռետորական չէ եւ այս առումով աւելորդ է  պատասխաններ սպասելը: Միակ  փաստը, որ կարելի է գրանցել այս դէպքերուն առընթեր, այն է, որ տուժողը մեր երկիր Հայաստանն է: Մեր երկրի ընդհանուր վարկն ու դիմագիծը: Եղածը  դատապարտելի է  բնականօրէն եւ պատասխանատու դիրքերու վրայ գտնուող անձնաւորութիւններ պէտք է վերատեսութեան  ենթարկեն երէկ գրանցուած ընդհանուր պատկերին էութիւնը:
Աւարտին հարկ է դրական շեշտադրումով խօսիլ երէկ Երեւանի փողոցները «գրաւած» երիտասարդութեան մասին, որոնք ոչ թէ միայն ելեկտրականութեան 7  դրամի   թանկացման դէմ կը պայքարին, այլ անոնք մեր հանրապետութեան ամենէն փայլուն, ամենէն  լիիրաւ եւ ամենէն  ոգեշնչող տեսակն են: Մեր ուշադրութիւնը գրաւեց հայրենի  արձակագիր Ռուբէն Յովսէփեանի այս առաւօտ  ըրած  Ֆէյսպուքեան գրառումը: Յովսէփեան իրաւացի էր երբ կը  գրէր. «Եթե կոտրուի մեր այս ջահելութիւնը՝ այս իշխանութիւններին ներում չկայ…»: Արդարացի է Յովսէփեան եւ հեռու մնալով շատախօսութիւններէ, լիայոյս  ենք, որ այս լարուածութիւնները արագօրէն կը վերանան եւ պատասխանատու մարմիններ ամէն ճիգ ի գործ կը դնեն, առանց  այս թանկացման ալ  ծանր բեռան տակ յայտնուած ՀՀ քաղաքացիին իրավիճակը բարելաւելու համար:

«Զիլ խօսք» (zilkhosk.com), 23 Յունիս 2015

No comments:

Post a Comment