ԱԲՕ ՊՈՂԻԿԵԱՆ
Յանուն արեւմտահայերէնի պաշտպանութեան, անոր կենսունակութեան պայքարը
այսօր ամէնէն հետեւողական ձեւով ստանձնած է «Գալուստ Կիւլպէնկեան»
հաստատութեան հայկական բաժինը՝ տոքթ. Ռազմիկ Փանոսեանի գլխաւորութեամբ:
«Կիւլպէնկեան» հաստատութեան այս բաժինը, որ անցեալին բաւարարուած է մի՛շտ
օգտակար բայց աւելի կրաւորական գործունէութեամբ՝ կրթաթոշակներ բաշխելով,
կրթական հաստատութիւններու նիւթական աջակցութիւն շնորհելով եւ որոշ
հրատարակչական եւ ուսումնասիրական աշխատանքներ հովանաւորելով, այժմ թեւերը
սոթտելով՝ իջած է հրապարակ ու յաջորդական նախաձեռնութիւններով
արեւմտահայերէնի ճակատագիրը բոլորիս ուշադրութեան կեդրոն դարձուցած:
Մամուլի տեղեկագրութիւններուն հետեւողները կը տեսնեն, թէ այսօր
արեւմտահայերէնի վիճակին մասին հասարակական զգօնութիւն բարձրացնելու
«Կիւլպէնկեան» հաստատութեան հայկական բաժինին աշխատանքը աննախընթաց
տարողութեամբ առաջ կը տարուի՝ Սփիւռքի եւ նոյնիսկ Հայաստանի մէջ:
Ակադեմական քննարկումներէ, խորհրդաժողովներէ, զրոյցներէ անդին անցնելով՝
զգալի է գործնական քայլեր առնելու նախանձախնդրութիւնը, միջոցները (որոնք
դժբախտաբար սահմանափակ են) ճի՛շդ ուղղորդելու ու անոնց ամէնէն բարձր
արդիւնաւէտութիւնը ապահովելու բծախնդրութիւնը:
Այսօր հարցը կ՛արծարծուի, խնդիրը յստակօրէն բանաձեւելու ճիգ կը թափուի
եւ լուծումներու մասին մտածելու հարթակներ կը ստեղծուին, մասնագէտներու
հասցէները կը ճշդուին եւ զանոնք աշխատանքի մէջ ներգրաւելու քայլեր
կ՛առնուին:
Ոգեւորութեամբ կ՛արձանագրենք այս փաստերը՝ հրաւիրելով մեր համայնքներու
պատասխանատուները ամէն կերպով աջակցելու ծրագրուած աշխատանքներուն,
խրախուսելու, ընթացք տալու եւ հարկ եղած պարագային՝ գործնականօրէն
նպաստելու անոնց:
Ամէնէն դժուարը, անշո՛ւշտ, արեւմտահայերէնը մեր կեանքին, մեր շրջապատին
մէջ ապրող լեզուի մը վերածելն է, հասնիլն է այն նպատակակէտին, ուր զայն
երիտասարդութեան շուրթներէն լսելը բնական երեւոյթ պիտի ըլլայ: «Կիւլպէնկեան»ի
խումբը իջած է մարտադաշտ. զինակցի՛նք իրեն:
«Ասպարէզ», 23 Յունուար 2016
«Ասպարէզ», 23 Յունուար 2016
No comments:
Post a Comment